雖然正式產假1/9先開始,但我返埋昨日咋,(星期六日是不計的),昨日返工其實是將工作交帶俾代我的同事,其實佢由開學日代我,一切由佢開始,都好喎~~咁啱學校第一年轉全日制,無論老師學生開頭肯定唔慣......我自己11月放完產假先接手就上晒軌道啦,HA HA
知道如果生左坐月時好多野唔食得,所以趁而家就生啦快D去食我好想食的野......
第一站梗係食壽司啦!!!
一知道有左已經冇食生野......成9個月啦!!!!
所以今次一定要食,唔理啦~~都就快生,應該ok的(當然仍要瞞住老爺奶奶)
唔知點解仲有好多奇怪野突然好想食,例如酸辣米線、白粥炒麵油炸鬼、麥記巨峰雪糕........一定要生之前食一次!!!!
8月頭參加左"康x"的BB護理機構舉辦的"孕媽媽淋巴按摩DIY"course,個course本身免費的,但我當日咁啱唔得閒冇去......
估唔到前日收到一個電話,話上完個course送一個免費去水腫療程一次,價值$888!我老實同佢講我冇上course喎~佢話照送俾我!!!
其實我都估係美容院的招數,氹我免費做一次之後就"坤"我啦!!
不過我又膽粗粗上去試下喎~~(師奶心態)
响佐敦的某商業大廈內,叫"美x人生",原來專做孕婦的,咁我又放心D!
D裝修ok喎,又獨立房有蒸氣浴室,首先叫我沖身(大肚後好耐未試過响屋企以外沖身啦!感覺好得意)之後要換浴袍,其實直情係一般去美容院做facial的step,只不過我9個月冇去美容院啦,好陌生!!
有個按摩師入來啦,原來呢個去水腫療程係同我按腳連小腿60分鐘,佢話專做孕婦的,叫我放心......好耐冇按腳啦,令我勁懷念北上按摩的日子......
按完同我2隻腳倒膜,暖暖的~~叫我休息30分鐘,但我跟本瞓唔到,因為要平瞓,呢個姿勢好唔舒服......
最後係沖身換衫......我預左佢會留我叫我join course,但竟然係冇喎!!!!哈哈!!!!搞到我有D唔好意思,反而問番佢拎單張參考呢~~~就係咁,我就無端端免費有得做呢個療程~~~好開心
但係,我發現我的腳仍然係好腫......
今日去QE 產檢,以為又係好似平時咁......
點知.......
一上床姑娘同我聽BB心跳後,醫生過來摸肚,佢又再話我個肚大!!!!
然後,竟然同我講:"我同你檢查下產道,如果ok我同你催生!"
我:"吓!!催生?醫生,我今日37週幾咋!!"
醫生:"37週幾足月啦!!"
然後姑娘叫我唔洗驚,放鬆俾醫生檢查,唔舒服就深呼吸.......
我可以點做?唔通反抗咩......(但個心砰砰跳,好驚呀,亳無心理準備嘛!)
檢查完啦,醫生又同我講:"暫時你都係唔適合催生住,但我安排你下週入院駁機聽BB心跳啦!"
我鬆一口氣,幾驚今日就俾佢推入院催生呀!!嚇C人啦!!!其實我都聽過有人真係覆診時即時俾醫生捉去入院生仔,但冇諗過差D發生响我身上呢!!!今日仲要係我自己去覆診,我覆完診即call老公話佢知啦,好彩今日未生得咋~~我個走佬袋D嘢未齊架
今日約左11:00a.m.在QE B3照超聲波,又可以見BB啦~~~
首先要我去繳費處登記,仲以為要交$$,點知佢話公務員唔洗$$$!
跟住就等見醫生啦,今次個女醫生冇咁cool啦,一邊照一邊講!!
我見到BB個頭掉左向下啦,一切正常!!now 36week幾,bb size就咁啱36 week幾呢
而且佢有6磅啦, haha~~
不過我胎水仍然偏多,醫生話有27度(我都唔明27度代表乜),佢叫我食少D喎.....(其實我唔係食好多啫!)
佢仲話下週足月啦,到時bb出世都ok!!(因為胎水多可能會早出世),好緊張呀!!!
睇見好多孕媽媽網友原來都請左工人湊B,而且都係最近的事,佢地都好唔慣呢
其實我都係一樣!!!!
我仲要係冇受外傭稅優惠最可憐的一群僱主之一(7月已簽約,未來2年仲要交$9600)!!!
冇法啦!!一早就預左請工人湊B,因為我地全屋人都要返工(連老爺奶奶),所以5月就去僱傭中心揀人,點知揀左果個唔來,僱傭中心就介紹而家呢個俾我,佢响新加坡做左6年,來港做左1個月,點知俾個香港人用經濟原因唔用佢......當初我都驚係咪佢做錯事,但我call佢舊僱主,又真係因為個舊僱主話唔關個印印事,係佢自己經濟問題,仲叫我可以日後聯絡佢,咁我見大家香港人應該唔會呃我呱???
於是我個印印2星期前就來左啦!!真係好唔慣有多個外人住响屋企......
但好處真係間屋乾淨整齊好多,食完飯乜都唔洗做,又有人幫你拎野......
不過印印唔食豬,買餸要預多樣啱佢食的,我發現自己餐餐唔係雞就牛,仲有佢要食早餐嘛(自己全屋人一直冇食),佢來左起碼要買定麵包、麥皮俾佢,唔通唔俾早餐佢食咩!!!變相又用多左$$$,到我地全屋人去街,又要掛住佢自己一個响屋企食乜呢!!!不過原來好多印印勁鍾意食麵(仲要係出前一丁),每次我叫佢自己食,佢一定食出前一丁架
家人方面都表現得好唔慣,如果我唔响屋企,老公唔敢返去,佢話唔想同工人獨處,我叫佢入房唔好理工人啦~~都寧願等我返左屋企先,唉~~
老爺奶奶又係咁,如果我去街,佢地都寧願出街食飯唔叫工人煮,佢地唔用慣工人,好多野自己做番,本來我叫工人幫佢地,佢地反而叫佢入房休息,唉~~激C我!!!佢地唔明第時叫工人做返就嫌多啦!!!!
距離預產期仲有3weeks,而家期待BB出世後,希望印印真係幫到我啦!!!
由於老公星期日先有假期,想去BB展就一定要最後一日,問定早2日已去了BB展的朋友們,都叫我一定要一早去,同埋收晒料去買D乜啦!!!
我已經好好彩有一對朋友們駕車和我兩公婆去更直接泊在會展,不用我行了~~而我更有一張免費入場卷直接進入會場,所以我便可以先在場內逛逛等老公買了飛與我會合
網友提醒要打定lable預備在小冊子貼上入各大BB會,果然很有用!!!而且拎左好多贈品呀:有尿片試用裝、濕紙巾、綿花、奶粉試用裝、cream、環保袋......
自己帶左個"車仔"預備掃貨,果然大派用場!!因為買左好多野呀:
1)NUK:濕紙巾獨立包裝10盒,洗奶樽液6枝,pp細奶樽2個,標準奶樽3個,奶樽擦2個,奶咀3pack,乳墊48片(另包送貨便訂了一箱濕紙巾補充裝及一箱洗奶樽液補充裝)total:$1549
2)Chu Chu:ppsu奶樽6個及阿B哥洗頭沐浴露1set+3包補充裝total:$724(送貨)
3)思詩樂:濕棉8盒+乾棉4包+紗巾4包total:$340
4)Casablanca:BB床上用品total:$430
5)BB沖涼網+收腹帶$266
6)BB車:$1999(送貨)
咁就用左我5千幾蚊~~~~好肉赤呀!!!返到屋企先識後悔,因為覺得濕紙巾好似太多了,唯有安慰自己佢有3年限期應該用得晒呱?
行左3個鐘就走了,贈品也成功拿了七七八八,我竟然不覺得太累,反而老公覺得累呢~~因為個"車仔"唔夠裝,佢要幫我拎幾大袋戰利品呀!!!!
本來星期三(6/8)去QE check血糖,點知8號風球,醫院打來改昨天(7/8)去了~~
一早8:30a.m去到,先抽第一次血驗,度數係4.4度(聽聞over 7.6就唔合格了),跟住俾我食一碗肉碎粥,等到12點又check,今次仲低,得3.5度~~
1:00p.m食lunch,有木瓜雞肉湯、節瓜、火腿冬菇肉片、一碗飯&一個橙,共有5個孕婦同我一齊食,其中一個叫我地唔好食晒D飯同個橙,食左一定超標!!!我梗係唔食啦~~食完仲週圍行下散步,到3點又check 啦~今次係6.5度~~
到5點姑娘帶我地去另一座,原來係產科房,有好多生左的媽媽&剛出世的BB呀~~佢俾間房我地坐,幾個大肚婆自然有傾有講啦,原來有D來醫院check左幾次啦!如果今次pass,好大機會唔需要再來check!!
5:30p.m.check左只有3.8度,咁我地6點Dinner就只有白菜&洋葱雞柳&一碗飯,我又唔食晒D飯了~~食完我地幾個仲一齊散步行左45mins先返上去!!
終於8:30p.m last 一次check了,5.2度~~Ha Ha~應該合格呱?(因為只有我&另一個孕婦check左5次都唔過7.6度,其餘3個都over左,所以我應該ok 啦!)
今朝收唔到QE電話call我,我當自己冇事啦!!
