超標了......

今早9點電話响~心知不妙!!

果然醫院姑娘打來話我昨日飲完糖水的血糖測試有小小超標,要約我去醫院全日檢查

最快的期就是下星期三,佢簡單的說當日要我8:30a.m.到,要留响醫院食營養餐,抽五次血,到夜晚先走得......

又叫我而家開始戒糖份、戒澱粉質,咁我可以食乜?

嗚嗚~~估唔到33週先要我咁樣~~

QE要收錢檢查

上兩個星期去QE覆診時,醫生摸肚話我個肚大安排左昨日(30/7)去照,咁我就同大頭仔又去見下BB啦~~今次同我照的女醫生好cool,照左幾分鐘都唔出聲,咁我問醫生個肚係咪大?有冇問題?佢只係答我BB sizes正常喎,又唔出聲就叫我出去等......

跟住見另一個醫生,佢又係話我BB sizes正常(其實都安心D),但個肚咁大可能胎水多......於是問我有冇做過血糖測試,我又真係未做(因為之前驗小便次次ok),於是就叫我今日做血糖測試(飲糖水)啦!唉......一直以為可以唔洗飲,點知到左而家33週都要飲

今日8:30a.m就自己去QE啦!都有十幾個孕婦同我一樣來做血糖測試,不過我個肚明顯大好多啦~因為多數孕婦係16週或者28週先來飲,(所以我以為自己會免疫),好少好似我咁遲,聽d有經驗的人講D糖水好難飲,飲完又可能會嘔,嘔左又要再飲過,fail左個test就要食營養餐......好驚呀

咁姑娘同我抽左第一次血之後就叫我飲啦,D糖水暖暖地,成一大碗,真係幾難飲!!!飲完等左2個鐘之後就抽第二次血就走得,姑娘話有問題先會打電話通知,希望收唔到電話啦~~~

奇怪的是唔明點解呢2日來QE竟然要我俾錢?之前一直都冇收架(連上次照結構都係免費的),仲話我係公務員所以只需$49,咁普通市民要幾多$$呢?真係冇諗過政府醫院連呢D都收$$喎~~如果我唔係公務員我一定去私家生了!

9月孕媽媽聚餐

昨天參加了一個很特別的聚會~~就是一共40個9月份的孕媽媽聚首一堂的tea buffet!

我們BB的預產期都是在9月份呢!難得的是我們透過網站中認識,大家分享陀bb的經歷及趣事,然後就是有一些熱心的媽媽提議及統籌這個聚會讓我們參加!

地點是在帝京酒店的funtion room,好讓我們成班大肚婆自成一角,場面太壯觀了,其實我只能與我同一枱的孕媽媽認識,未能全部40個交流,不過都好開心啦

除了有tea buffet吃外,還有大抽獎呢!真係要一讚搞手,竟然可以找來贊助商送出禮物,仲要人人有份,永不落空!HA HA~

有床仔啦!

之前一直發現有好多9月份的孕媽媽已經買左床仔俾BB,我都好心急想買,但係奶奶一直話唔好買住,佢話會揾到有人唔要會俾我地......結果又真係揾到呢!!!!

雖然係二手,但係仲好新呀!而且仲係"0/3baby" 呢個牌子,哈哈!慳番成千蚊

仲未放暑假......

唔知大家睇唔睇得明幅相呢?就係我而家工作的地方啦!

唉~~當間間學校都放緊暑假時,我地仲未放呀因為學校暑假後轉全日制,下午校要搬走,我地上午校原校留低大裝修,於是我地個個係咁執野、掉野囉!呢幅相我都覺得幾壯觀,因為我地名正言順地高空雜物,將D廢紙响樓上掟落操場!(因為唔通要我地搬落去咩?呢個方法係工程人員叫我地咁做,而且之後有好多收廢紙的亞婆爭住拎去賣添!)

走廊全部放滿枱櫈......

目的係要我地騰空D課室俾人裝修!

咁我地老師D私人物件全部入紅白藍袋&pack箱塞晒入呢個音樂室呢~~又係另一個壯觀景象!!

我個位終於清晒啦!不過教員室都會大裝修,D枱枱櫈櫈全部會掉,都幾浪費~~

其實而家學校已經變成一個地盆咁啦!但係我地仲要返學開會、開會、開會......仲要返埋下星期呀!我D同事都替我辛苦,話晒我大住個肚,都要返來同四十幾個同事屈埋一個未裝修的課室開會!唉!咁個個同事都未放暑假,我又點可以唔返呢?

Roadshow 訪問

 

星期日代表學校去領獎,主辦單位本來要我上台接受訪問,我推說我腹大便便不方便呀(其實嫌自己咁肥俾咁多人望住好肉酸),於是叫我改做台下訪問,咁我就應承啦!

點知响個頒獎禮完左之後,工作人員叫亞司儀蔡子健過來,仲有部攝影機對住,我先知所謂的台下訪問原來係巴士的Roadshow訪問!!!OH!!!!咁肥上鏡咪仲肥!加上素顏look......但一切已太遲了!!各位有機會搭巴士見到呢個訪問,唔好嚇親!

心情好點了!

之前醫生話我超重,朋友又見我手腫腳腫,於是介紹我去做孕婦瑜伽,我見又唔係貴,($800十堂),加上地點又近老公工司,我上個月已經參加了,昨日已經係第5堂,發現原來有D同學仔己經35/36週了,唔怪之得佢地個肚咁大啦!

其實我發覺孕婦瑜伽同一般瑜伽冇乜分別,都係要做埋D"樹式","貓式"等等,對於我這個平衡力極差的人,成日左搖右擺,都幾搞笑

但我又覺得效果幾好喎,因為上星期去照4D時,醫生冇話我超重啦!不過亞仔就好怕羞,只係俾側面我睇,醫生照左好耐都係咁,於是叫我出去同亞仔傾下計,大約45分鐘後入去再照,叫做好少少,佢俾個三七面我睇下,我發覺佢成個男仔樣呀!!!!(雖然佢真係男仔)但我想佢似我嘛,呢個係中大碼B,醫生話100係最大佢就排第80!我想佢係中碼呀,咁我可以容易D生嘛!

呢排亞仔踢我踢得好犀利,我覺得佢好似响我肚入面翻騰咁,有時响肚皮見到彈下彈下咁,好得意呀~~~

這令我的心情比之前返工時好得多了!HAHA!