第二次照結構

距離上次在私家診所照結構只有11天,今日又可以見見大頭B了!

因為今次照結構是QE無端端免費同我安排的,咁lucky又免費梗係去照下啦!

但原來要錢同免費的分別係好大的:

1)私家的儀器及設備比政府的先進好多(淨係個螢幕都唔同D啦!政府要我打側個頭去睇醫生個螢幕,私家的當然有獨立螢幕俾我睇)

2)私家的有相有DVD拎走俾我留念,政府的乜都唔會俾你~

3)私家的醫生細心及詳盡講解得多,政府醫生只是簡單講幾句~

點都好啦,可以見下大頭B又知道佢正正常常己經好開心

己經23週啦,個肚大左好多啦!睇下~

照結構

5月9日去了私家診所照結構,醫生話我超重了~~嗚

因為我已經重左20磅啦,(醫生話正常應該重十幾磅),大頭仔問醫生我係咪要食營養餐,佢話暫時唔需要.但真係要注意飲食!

知道好多孕媽媽都要响醫院飲"糖水"check糖分,唔合格就是患"妊娠糖尿"了!但我响QE產檢咁耐,醫生都冇叫我飲"糖水"喎~聽聞D"糖水"勁難飲,好多人飲完就嘔,嘔左又要再飲,唔知我可唔可以免疫呢?我唔想飲呀,我驚真係會唔合格呀!!!

今日照結構睇左大頭B的手手腳腳,手指腳趾......好得意呀!最重要係一切正常,冇兔唇冇心漏!同埋見到佢不停咁郁,又出拳又踢腿,我、大頭仔同婆婆睇得好開心

今次要埋隻DVD俾老爺奶奶睇,佢地驚歎科技先進,可以用DVD睇番呢個照結構過程,並唔係普通黑白相呢!不過,令到佢地最開心的,應該是他們看見了大頭B的"JJ"了!哈哈!

感覺到了!

上星期19週時一直等待感受大頭B在我肚內胎動,跟住身邊的有經驗人士都話20週就郁啦~~果然,到大頭B20週時,我終於感覺到佢响我肚入面郁啦!