BB就快兩個月大了~又係時候要去 打針!一早諗住要去私家打 5 合1,寧願俾錢幫BB 慳番幾針都唔想佢痛多幾次!!睇過D網站介紹了佐敦有一間打package 要$5800, 叫全港最平,咁我都打算join仲電話預約左添!!
點知日前發現屋企樓下間醫務所有5合1疫苗海報貼出來,咁我 入去問下姑娘,佢話有得打5 合1呀!仲話而家醫生得閒叫我入去問醫生, 醫生話佢地D疫苗齊晒架! 叫我到BB兩個月帶佢來打5合1,咁我問有冇肺炎鏈球針&輪狀疫苗, 佢話有, 但建議我可唔洗打肺炎鏈球呢支針,我問乜唔係一定要打咩? (我見D表列出呢隻針有4次要打wor)醫生話D表係嚇人架,等人以為一定要打!哈哈!咁都得?
我都係唔放心,問佢係咪真係唔洗打?佢話一般BB頭三個月有抗體,所以可以唔打, 如果打多針BB咪痛多次law!估唔到呢個醫生竟然咁講,有生意都唔收多我多一支針錢 呢!咁我計過如果咁樣逐次散打本應貴過出去佐敦打package,但如果我慳左呢支就 平D啦,BB又唔洗舟車勞頓出去佐敦&痛少一次,所以我都係決定 响屋企樓下打了!!
預料BB打針時一定扁晒咀!
BB己經有個半月大左右了,湊B的技巧仍在學習中......
因為.......
早上有工人姐姐幫手,由8月開始請佢,主要係用1個月時間睇下佢做成點,家務及煮飯都ok啦~到BB出世,我呢個新手媽媽都係雞手鴨腳,見工人姐姐抱B, 餵B,換片&BB沖涼都熟手過我,(因為我D手勢生硬令BB唔舒服搞到BB扁晒咀),咁我都放手俾佢做,我只係從旁觀察.......
晚上老爺奶奶&老公放工,返來爭住湊,我更加要放手,所以......
我唯一做的只是餵媽媽奶!奈何我的奶量唔多得去邊,要補奶粉才夠!
產假在倒數中,仲有2星期多便返工了,我返工便不能埋身餵媽媽奶了,咁咪唯一用處都冇埋?所以我好珍惜而家餵媽媽奶的時刻!但又怕要BB一下子冇得啜會扭計,因為我發現他好多時候要啜下媽媽奶才安睡,可能當我係人肉奶咀!不過,我樂於咁做,因為這是我與BB最親密的時光呢!又怕一下子唔餵又谷奶勁痛,好唔開心呀!!
仲有就係究竟坐完月未?之前因為惡露未清唔敢補,過左成3個星期先至食下燉雞,薑醋咁,又有人話餵媽媽奶唔好食薑醋,同埋要食多D嘢唔好減肥......昨天去做facial時冇見個美容師9個月,第一句就話:"乜你肥左咁多?"我直情當頭棒喝!!!!!又難怪佢,佢唔知我大肚生埋仔呢!!!
又有人話坐月係100日,100日內仲要補,補乜呀?唔通又叫奶奶燉野俾我食咩?我其實而家都冇食D補野,只係食量同陀仔時一樣咁多,如果太少好似對餵人奶唔好,搞到我唔敢減肥住......
(圖1)工人同BB沖涼,我只從旁觀察......
(圖2)BB最愛看五顏六色的玩具!
昨天去替囝囝拿出世紙~原本都唔想去,想再遲多幾日,因為假期後第一個工作天一定多人!!果然冇估錯!!我8:30a.m.去到九龍出生登記處,已經見到條"蛇餅"!好驚呀~~聽到D人話排頭位果個5點鐘去到~唔係呱?仲見到D人抱埋BB排隊,好辛苦呀,响條街點換片&餵奶呀?
我都要繼續排啦~都驚冇籌呀~(因為得160個咋),點知排排下俾我發現排我前20個人係網友C,哈!梗係call佢然後"打尖"啦!原來佢只係早我15分鐘到就排前我咁多!!
我地發現勁多大陸人呀~真係好多人落來生,如果分開排咪好law!咁我地D香港人肯定唔駛排咁後!!
雖然8:45a.m.開始辦公,但結果由街排到上去辦事處拿籌要等到10:00a.m.,仲要係173號(好彩果日加到185個籌咋)
好彩我"打尖"咋~如果唔係就白行了!但要等到下午先接見,於是要返屋企再出來!出來就見到......
一日就有咁多人拿出世紙!第日亞仔乜都多人爭了!
Hello!我有出世紙啦~我叫"朗天"呀
仍然日日飲上奶湯:木瓜魚,章魚,通草,花生,雞腳......
但是仍然好少奶!點解?
亞仔啜完人奶30mins仍然唔夠,初時補2安奶,只可以頂一個半鐘又喊......
咁補3安奶啦,可以頂2個鐘!
全奶粉4安就乖乖瞓3-4個鐘!
老公結論:唔知食幾多人奶落肚,可能得幾滴......
咁我泵出來啦~~泵一個鐘(每邊半小時),有時1-2安,最多都係3安......咁又真係少喎~~
試過全人奶,半個鐘就喊,咁我堅持一喊就餵(當然check下係咪要換片先啦),堅持到夜晚老公放工見到亞仔咁樣,忍唔住開奶粉俾佢,亞仔當然好肉緊咁食晒成支奶啦!老公就話:"亞仔,饑饉三十呀?"
唉......我聽到其實好灰架~~
叫自己唔好俾壓力自己,連醫生都叫我補多d奶粉......
所以到夜晚至半夜我全程交晒俾老公+老爺奶奶佢地輪流餵奶粉啦,咁都好,我夜晚就非常輕鬆,可以有覺好瞓
亞仔:鬼叫亞媽我咁少奶咩?你又咁鬼大食.....
個樣又好似唔同左!
