o咀B

好想影低BB笑的樣子,好難捕捉......卻發現佢成日"o"咀!!!

人奶+奶粉?

未生之前都打算餵BB食人奶,但原來實行起來真的不易!!

BB在晚上出世,姑娘叫我好好休息,我也真的很累,所以BB俾姑娘湊沒有飲人奶......

BB出世第二日,醫生說BB好多口水不適合吃人奶,(其實唔係好明),所以又俾姑娘餵奶粉.....

BB出世第三日,姑娘終於俾我餵人奶,但我好"生手",加上好似未上奶,BB成日喊,姑娘又幫我補奶粉......

BB出世第四日,醫生check到BB血糖低,"命令"我一定要幫BB補奶粉!!因為人奶唔夠飽!!!

BB出世第五日,因為飲左奶粉,血糖已經回復正常,可是黄疸指數高左,要留院照燈,於是在醫院的五天都係飲奶粉......

BB返到屋企,我餵人奶,但BB好像不夠飽,家人看見BB常喊,好心痛,於是補奶粉,BB又真係飲左奶粉乖乖安睡......

返健康院姑娘教了我餵人奶技巧加上解答我疑問,我信心又大左,以為自己可以成功!!點知冇幾耐BB又成日喊,家人又再認為BB唔夠飽,要補奶粉,BB又真係飲晒3安奶粉,唉......我真係好內疚!!我好可能唔夠奶俾BB

家人唔支持我餵人奶,老公覺得我又辛苦(BB一個鐘左右又餓了,跟本冇得瞓),BB又唔夠飽,我已經日日木瓜魚湯了,我用泵奶器又真係每次泵得1安......好失望......

今日再返健康院,醫生都叫我補奶粉,咁我唯有當我D人奶係甜品咁俾BB啦!!!

P.S附上BB近照數張(注意後面幾張LOAD得比較慢)

 

囝囝第一次往健康院

昨天早上第一次帶囝囝到健康院檢查,我好緊張呀~因為囝囝之前因為黄疸留在醫院照燈,而我獨留在家坐月勁掛住佢所以成日喊,好彩佢在中秋節前夕可以出院陪我過節,所以今次到健康院檢查好驚醫生話佢又黄要捉返去醫院照燈呢!!!

首先BB俾姑娘磅重,而家佢有3.34KG啦!重左,有進步!!!臍帶响第7日就响醫院甩左,老公一直怕同囝囝沖涼時唔識洗臍帶,點知响醫院就甩左,有姑娘同佢整好啦!!

健康院有姑娘教我餵母乳技巧,佢地好有心機教,睇住我囝囝食唔食到,又解答我的疑問,服務好好!!!

最後見醫生啦!今次D黄疸指數低左,唔洗照燈,而且其他一切正常,ha ha!好開心!

俾幾張近照大家睇下啦!!!

囝囝出世了~

Hi Hi~~各位好!

BB在9月5日出世了!順產,重7.2磅

我總共住了醫院6日,前日才出院,昨天仍然覺得好攰,所以今日才告訴大家呢!

入院及生產過程:

9月4日早上8:30到醫院(是醫生寫了入院紙俾我),我便被安排住在QE的大房住,因為醫院話同我排緊隊上二等房,但太爆了,要暫住大房先!!

巡房醫生替我塞葯催生,塞葯在宮頸位置2小時,期間駁上聽bb心跳機,我躺在床上整整2小時呢,之後我便可以自由活動,靜待陣痛......

可是我全日亳無陣痛感覺,不過條腰勁痛,之前都未試過,唔知算唔算陣痛之一呢?成晚瞓唔到,因為大房住滿人,我附近個個輪流因為陣痛大喊大叫!!!我自己睇見聽到都有d驚,有一刻想過不如開刀生......

終於捱到第2朝,9月5日,早餐後醫生巡房,首先係一個後生女醫生,佢話d葯對我無效,可能今日又塞多次,以為又要悶多一日,點知隔一陣有個較高級的男醫生同我check,佢就決定即刻推我入產房催生,仲叫我通知家人啦~~咁快?我要求俾我沖個涼先都唔俾.....就係咁,我即刻通知老公來啦!!!

由於我行得走得,一d痛都冇,姑娘叫我跟住佢行去產房的,QE的產房幾靚喎,獨立房好似酒店,有電視電話洗手間,姑娘叫我自己上床等醫生啦.....

早上10:30醫生同我穿水&吊催生針落葯,11:30我開始覺得痛了,姑娘教我一痛就聞氣,又開電視俾我睇,大約1點老公入來產房陪我啦!不過我開始矇矇矓矓,同埋叫痛,姑娘問我要唔要做無痛分娩,我唔肯,不過叫佢打止痛針了!

到下午4點,我痛到神志不清加發脾氣!姑娘叫我聞氣我大叫"好痛呀~唔吸啦!"老公叫我做無痛分娩,我痛到乜都肯了,老公叫醫生快d叫麻醉師來,我又矇矓中簽左名就叫我打側瞓唔好郁,麻醉師要响我脊椎落葯......真神奇!!!真係即刻唔痛啦!!

感覺係將痛楚減低7成,我feel到陣痛但頂得住,我仲可以同老公傾計,又聽到隔離產房孕婦大叫,剛出生的bb喊聲......老公話佢已經聽到幾個bb出世了,姑娘話今日勁忙呀!!!

6點鐘老公叫姑娘放佢出去食飯,check過我應該仲未生,其實期間我不斷感覺到有一群助產士每隔一段時間就check下我,而我老公都開始識睇我側邊部儀器,佢話d數字一上升就知我痛喎.....

電視做緊"尖子攻略",我的痛亦去到最勁,其中一個助產士好似知我生得啦,叫我預備,教我吸氣忍住......bb要出世啦!已經見到頭仔,但突然又叫我停,我又真係聽佢話停,但我痛得大叫,老公話原來我太快了,助產士仲未舖好張墊!!等佢舖好叫我繼續......bb出世了!!老公話bb好似"飛"出來,全身好似搽左無比膏,姑娘"吸"左佢d痰後,我聽到佢喊啦!!!

真係好似做戲咁,抱bb埋來叫我答仔定女,第一時間叫老公拎相機俾姑娘拍全家福!!!

生完等醫生聯針,醫生話我傷口好深呀~~我只係知道佢用左半個鐘幫我聯,搞掂然後送我上2等房,好了!唔洗去大房呢!HA HA~~

明天入院了!!!!

相信呢篇blog應該係我生仔之前寫的最後一篇啦,之後仔仔應該出世啦!!!因為......

我明天入院催生啦~~

話說今朝要到QE駁聽BB心跳機+覆診,首先要見醫生,今次呢個係好後生的女醫生,佢同我摸肚後又探我子宮頸,之後又多一個女醫生入來,就叫我唔好走,而家入院同我催生啦!!!

我:吓?咁快???

佢地話上星期已經想同我催生,係我子宮頸未得,今日好D啦~~可以落藥同我催生!!!

佢地見我好驚,旁邊個姑娘都勸我入院,又話入左院都可以週圍行,未咁快生得,下午叫老公拎野入來俾我都未遲......

我話自己冇心理準備呀~~老公又返左工,想call佢問意見,又同醫生講等多一日,聽日先啦!!(俾我執下野沖個涼洗頭都好呀!)

於是佢地放我出去打電話,老公又叫我call奶奶問佢意見,奶奶話如果醫生話要入都冇計.......

哈哈!!此時另一個姑娘問我係咪想聽日先入院,我梗係答yes啦,佢就話原本我今日要駁機聽BB心跳,不如聽左再問醫生啦~~

於是入左去聽心跳機,姑娘叫我聽半個鐘,有個"制"如果BB郁就按一下,但係呢半個鐘BB好似瞓左覺呀,所以按好少次數,(姑娘check時都咁講!!)之後姑娘叫我等醫生睇下俾唔俾我走啦~~

等左一陣,姑娘俾左聽日張入院紙我叫我早上8:30入院啦!!!!然後走得!!!!

我即時去QE附近間恭x堂食龜苓膏啦,又去橫綱食個九洲拉麵先!!HA HA!!

因為好大機會聽日生啦~~要有排先有得食呢類野......

好緊張呀~~因為聽人講催生好痛架.......

今晚一定瞓唔着!祝我好運啦

 

最後一次私家產檢

今日38週啦~~(不過私家醫生同我check的預產期比QE遲4日,所以佢認為我得37週3)!呢個私家醫生實在太full啦,我原意book佢同我check "B型鍊球菌",以為8月有期(我7月book的)點知等到1/9今日,仲諗住可能生左唔洗來,又諗緊咁遲成38週仲來唔來想慳錢......不過經過上週QE之驚險產檢後,決定一定要問下私家醫生的意見!!因為後日又去QE覆診啦,可能又俾QE個醫生捉去催生

私家醫生同我睇下BB係咪真係咁大......哈!佢而家有7磅啦!!!頭、手、腳的size都係37週幾,係個肚圍有成39週!!!醫生話佢有肚腩仔,可能真係因為我食得太甜啦,胎水多左少少,係因為媽媽食得多BB又食得多痾得多就會多胎水喎~~~

於是佢認為QE個醫生認為我肚大胎水多BB早d出世都好喎~~~

不過佢都同我再check我是否適合催生......答案係仲未得!!!佢話我宮頸仲係好厚,除非用藥催生啦!!!咁即係BB仲有機會留响我個肚到預產期了!!!

佢叫我戒食甜啦,如果再留多2星期BB可能8磅醫生話生得好辛苦喎!!!

最後同我check埋"B型鍊球菌"就走得,仲送左幾張亞B的4D相俾我,亞B暫時仲見到佢個樣呀,即係仲未落晒去盆骨......真係好可能要我响醫院過中秋!!!

睇完醫生,即刻捉老公去食我想食的粥、炒麵、油炸鬼先!HA HA!!!