今年的2月好忙呀~~首先是新年前忙於拾行李,因為深水埗層樓賣左啦!我呢個居民要响新年前執番自己仲有咩要,其餘的就俾晒隔離屋的亞婆(佢不知幾開心,乜鬼都要,衫褲鞋襪帽手袋電器報紙書藉CD傢俬全部掃清,仲俾$30我飲茶
)我怕我有日行鴨寮街會見到自己D野响地下賣呢!Pack野又搞左幾日......
到新年啦又週圍拜年派利是飲飲食食吹水,少不免新年期間大戰四方城睇戲等等,與親戚朋友睇"閃卡",個個一有新的"閃卡"或未齊的就問大頭仔,簡直污染左我部腦呀!!!
臨開學前一晚睇克勤,氣氛唔錯,大頭仔又幫我搬好深水埗D野去新地方:紅磡,我2隻愛犬從此响紅磡住啦!日前與好友慶祝生日自己一個行左幾粒鐘買禮物夜晚再食飯,禽晚同大頭仔睇林海峰笑足兩粒鐘,難得大頭仔話睇左3次林海峰最好笑今次,又真係幾好笑不枉我買了最貴的門票!(每次佢都話我嘥錢架!)
話咁快2月就過去了,開心的時間過得特別快
繼日前俾D學生激親之後,一波未平一波又起,想唔病都難!!!!
話說今日係派成績表見家長的日子,有兩位極度無理之母親向我投訴,本來我都好言相勸,誰知佢地跟本講極唔明......
事件1.母親A昨天在早上7時多入課室,(當時我未上堂,8:00才正式上課),她一入課室不斷去鬧班上其他同學,因為那些同學"話"佢個仔曳,更用手拍打其中一個學生的頭,之後走左,咁到我入課室佢地梗係話我知啦!最搞笑係個仔都話佢亞媽食左火藥咁鬧人!!
咁我今日見家長,咪同佢講佢唔可以咁做,咁樣會嚇親D細路啦!點知佢對昨天的事認為佢冇做錯,仲不斷投訴其他同學屈佢個仔曳(大佬呀,你個仔真係好曳架),我話你拍學生的頭,佢竟然用手拍我的頭2次(示範佢點樣做),然後就話:我好似頭先咁細力之嘛!! ~~~吹漲~~~~喂,你又唔認你個仔曳,仲要同佢出頭,痴線架!!!!
事件2.母親B仲離譜!!話說佢個仔成日"令"轉身傾計及出位,加上日前佢偷左後面同學個筆袋並收埋响課室某角落,咁我即時响全班面前處罰佢......點知佢亞媽今日就投訴!!!
我:你個仔成日"令"轉身撩同學傾計,有時又無端出位喎!
母親B:你間セ學校嚟架?都唔明點解唔俾人傾計同出位! (痴線!咩理論?)
我:佢上堂咁樣會騷擾其他同學留心上堂架!
母親B:你成日拉開佢張枱自己一個坐佢會唔開心架,而家D同學,風紀話佢曳所以俾老師拉開張枱呀,咁唔係幾好啦! (喂!你知就好啦,就係拉開佢張枱等佢唔好騷擾人!)
母親B:仲有呀,佢之前收埋同學個筆袋係玩下啫,你咁樣罰佢搞到而家D同學話佢係賊呀,冇人同佢玩呀!佢都成日响屋企收埋D嘢整蠱下屋企人啦!呢D小事而家D同學化大左佢好唔開心law! (你咁樣都認為小事,家下你個仔真係有做過喎!)
唉~~~見完晒所有家長,我返到教員室向同事申訴呢2位偉大母親的事,同事叫我唔好勞氣,將來佢地一定自己受番晒!!同埋我明白點解呢2個學生咁曳,因為有其母必有其子!!!
