BB第一份得獎禮物

早前幫BB參加左Pampers舉辦的"makeawish"活動,經各方好友大力支持幫手投票之下,朗天終於成為10篇最窩心的<愛的祝褔>其中之一!!!等左一段時間,終於收到份得獎禮物了~(其實只有尿片一包&一張小餐椅) 咁大把.......

仲有就係登左BB張相响雜誌入面(第二排最左邊果張)

都好啦~留為紀念ma~

BB攞証件

由於爺爺好想農曆新年期間可以帶BB回鄉探親,所以要同BB攞回鄉証!但原來要先拎回港証or passport先可以攞回鄉証,仲要預算埋D工作天,今年個農曆新年係一月尾,嘩!!拿拿聲去辦証先!!

先同BB去影証件相,真係要出九牛二虎之力,爸爸扶住BB坐好,我就同攝影師不斷引佢望鏡頭,好彩係數碼機可以影好多次,先可以响十幾張揾到張好D~~

之後帶BB去拎証啦,一早响網上預約左,咁就唔洗排隊攞籌,好彩嫲嫲陪埋一齊去咋,我以為我填好張申請表就ok,原來我仲漏左張表係要父母之外的第三者簽名,咁叫嫲嫲簽囉!!!

我唔想又再揾一日帶BB去申請passport,所以我一次過申請回港証加passport了,係就係嘥多$140申請回港証(因為其實有passport都可以過關)但我因為趕住申請回鄉証,而passport要1個月後先有得拎,回港証就即刻有了,冇辦法啦,鬼叫我唔一早申請咩!?

BB又去街街!

雖然之前有人話BB太細唔好去咁多街,但我地唔理啦,反正屋企人認為BB去多D街曬下太陽仲有益,而且BB出街好似好開心咁呢~

(1)一家3口行下商場

(2)在新都城中心

(3)在南蓮園池

(4)睇下花花草草

(5)坐得好唔舒服呀!

(6)好憂鬱咁望魚魚

原來冇乜人知道南蓮園池呢個地方,响我屋企附近行過去好近咋!

BB@100日

等我upload下個仔100日當日的相上來俾大家睇下

(1)爺爺嫲嫲幫BB剪100日的頭髮,然後揾個利是封入住D頭髮!

(2)男仔的蛋糕款冇乜好揀,最後揀左THOMAS款

(3)睇下BB咀角流口水架~~

(4)滿月嗰日唔記得一家三口合照,唯有100日補番!

(5)爸爸俾個朱古力牌BB試下......

(6)玩奶樽.....

(7)唱下歌......

(8)鍾意踢波波......

100日一家大細食餐飯影下相,己經好開心lu~

朗天100日大叫呀

唔知點解朗天最近成日大叫呀!!!

呢日係佢第100日拍的~~~好嘈呀!!!!

 

餅印

真係似爸爸多D? (仔仔&爸爸小時候)

咁我呢?(仔仔與我的小時候)

手模腳模

在BB五星期時做的手模腳模,今日終於收到貨了!

去街街!

最近帶BB去街街,影左靚相相 不過在mega box遇到一個亞伯問我亞B有幾大, 我話 有兩個幾月,佢語重心長咁同我講BB太細啦,唔好帶佢出街,超碼等佢半歲先喎~ 但我發現商場裏面有好多比亞B更細的BB都係咁出街啦!!!!

(1)與爺爺嫲嫲在mega box影相

(2)肥媽媽擺我上枱

(3)媽咪又要我揸車......

(4) 後面的獅子代表獅子座的爸爸!

(5)充滿聖誕氣氛的荷里活廣場

(6)爸爸和我在餐廳

(7)金舖內的聖誕樹

(8)南蓮園池一遊

(9)去街街真happy!!

排第五......

返左工一個多星期,每日要到放工先見到BB,之前未返工仲餵人奶時,一抱BB佢就啜啜啜,好warm,而家戒咗人奶,唔知點解抱親佢,佢都好似唔like咁,個身扭嚟扭去,可能我抱慣餵奶的姿勢,一抱就會啜我件衫,咁我試下抱另一D姿勢,都唔掂.....仲會喊同推開我!!!!! 好hurt!

BB呀,你唔認得亞媽啦!?而家個個放工爭住抱,最認得就係嫲嫲,第二係工人姐姐,跟住係爺爺,第四係爸爸,而我?排第五......

(1)BB最愛嫲嫲抱

(2)鍾意同爺爺玩

(3) 鍾意同Daddy傾計

(4)排第五的媽咪

返工啦(返學啦)!!

漫長的暑假加產假(共前六後八)個星期終於完結......昨天正式上班(上學)了!!!

特登早點回校,學校因為今年轉左全日制而在暑假裝修,我今日返學先至第一次去新的教員室,坐新的位,仲要睇新的課本,上新的時間表......乜都新,乜都未試過,感覺好新奇,我覺得自己像學生多過似老師!!!

同事們很好,個個都會問我慣唔慣,又問我係咪好掛住仔仔,又話我好精神(不過修身仍需努力!!haha~)

我回校只有半個鐘時間就去上第一堂,書都未睇過點準備?仲要認學生D樣&名,今年教二年級,好彩有D學生都教過,好快就認得晒佢地啦!!

一大堆卷要改,一大堆文件要填,一大堆野要執,仲有一大堆課本要備......

好懷念以往返上午校的日子,兩點就放工了!!可是今年開始轉全日制,最早也要四點才放工,歸心似箭!!唯有帶埋d卷返屋企改,對住BB改卷好過對住個位改嘛!!

返到屋企BB乖乖在睡,佢好似唔知我返左工咁呢~~現在覺得自己心態不同了,目標是早點放工回家看BB!!!

p.s 附上BB近照數張

換大盆

BB沖涼多數由工人姐姐負責,我每天從旁觀察~發現BB個身愈來愈長,又鍾意腳撐撐!之前個沖涼盆比較短,BB一撐腳好容易撞親個頭,我唔放心我返工冇人睇住BB沖涼, 萬一撞親咪弊?於是買個新大盆!

係咪大好多呢?

這幅浴照又上報了~haha!!

現在BB有更多位swimming 啦~

 

矛盾......

今日在矛盾的心情下寫這篇blog,因為我決定今晚開始停止餵媽媽奶了......

一直得不到家人支持,昨晚仍然聽到老爺說BB吃人奶不夠飽,我便告訴他餵埋明天便停了!!!

原因大家可能覺得有點怪,是因為今晚是奶奶生日,訂了一圍蛇宴加大閘蟹!當我早前知道時曾問她乜我可以食咩?(我仲餵人奶&未坐夠100日月wor~)她都替我問其他人,得到答案是大閘蟹就唔好了,太寒,但蛇是補的,可以吃!!!由於是她生日宴,我怎可以不去?蛇宴樣樣餸又有蛇,其實我怕BB吃我的人奶會敏感呀!!

加上下星期也要返工了,早前都決定返工就停人奶吧~現在提早了幾日law~

但非常不捨得BB啜媽媽奶時的樣子.......很可愛很窩心~

所以很矛盾......

不過算啦~我又真係冇乜奶了,泵了一個鐘也只是得60ml,有相為証,haha~

這是我最後一次泵了,所以要影低佢,睇下真係少得可憐......BB啜成個鐘都只係得咁少......

慳番一 針?

BB就快兩個月大了~又係時候要去 打針!一早諗住要去私家打 5 合1,寧願俾錢幫BB 慳番幾針都唔想佢痛多幾次!!睇過D網站介紹了佐敦有一間打package 要$5800, 叫全港最平,咁我都打算join仲電話預約左添!!

點知日前發現屋企樓下間醫務所有5合1疫苗海報貼出來,咁我 入去問下姑娘,佢話有得打5 合1呀!仲話而家醫生得閒叫我入去問醫生, 醫生話佢地D疫苗齊晒架! 叫我到BB兩個月帶佢來打5合1,咁我問有冇肺炎鏈球針&輪狀疫苗, 佢話有, 但建議我可唔洗打肺炎鏈球呢支針,我問乜唔係一定要打咩? (我見D表列出呢隻針有4次要打wor)醫生話D表係嚇人架,等人以為一定要打!哈哈!咁都得?

我都係唔放心,問佢係咪真係唔洗打?佢話一般BB頭三個月有抗體,所以可以唔打, 如果打多針BB咪痛多次law!估唔到呢個醫生竟然咁講,有生意都唔收多我多一支針錢 呢!咁我計過如果咁樣逐次散打本應貴過出去佐敦打package,但如果我慳左呢支就 平D啦,BB又唔洗舟車勞頓出去佐敦&痛少一次,所以我都係決定 响屋企樓下打了!!

 

預料BB打針時一定扁晒咀!

BB似我又似爸爸

個個都話BB似爸爸,等我試下呢個網上測試,結果係......

一半一半喎~唔通唔準!?